Blog

 A AGADIC FINALIZA AS ACTIVIDADES DO PROGRAMA CREATIVA CO APOIO AO FORO DE EDICIÓN E TIPOGRAFÍA FEET 2010

Imprimir creativa - 27-Novembro-2010 - 13:55:40 

Organizado pola Asociación Galega de Deseñadores, celebrarase do 2 ao 4 e do 16 ao 18 de decembro na Casa das Campás de Pontevedra.

Profesionais galegos e portugueses participarán en mesas redondas, conferencias e obradoiros intensivos sobre revistas de arte experimentais e deseño de tipos.

As obras dunha decena de editoras internacionais configurarán unha exposición que estará aberta ao público entre os días 2 e 16 de decembro.


Pontevedra, 24 de novembro de 2010.- O programa europeo CREATIVA para a difusión das industrias culturais do sur de Galicia e o norte de Portugal chegará ao seu fin o vindeiro mes de decembro coa celebración na Casa das Campás de Pontevedra do Foro de Edición e Tipografía Feet 2010. Profesionais galegos e portugueses participarán nas mesas redondas, conferencias, presentacións e obradoiros que se desenvolverán do 2 ao 4 e do 16 ao 18 de decembro baixo a organización da Asociación Galega de Deseñadores (DAG) e co patrocinio da Axencia Galega das Industrias Culturais (Agadic) no marco desta iniciativa transfronteiriza.

Con financiamento dos fondos FEDER da Unión Europea, dentro do programa POCTEP, e promovido conxuntamente pola Agadic e a portuguesa Direccão Regional de Cultura do Norte, a programación de CREATIVA deu comezo a finais de 2009, apoiando dende entón unha trintena de actividades que van dende exposicións e espectáculos abertos ao público ata foros e obradoiros profesionais sobre os diferentes sectores da industria creativa, como o produto gráfico, o audiovisual, as artes escénicas ou a música.

Prazas esgotadas

As diferentes estratexias e soportes empregados hoxe en día no ámbito da edición serán o eixo central do Feet 2010, que dará comezo o vindeiro 2 de decembro co Taller de edición e xestión de revistas de arte experimentais a cargo de Pepe Murciego e Diego Ortiz, responsables da plataforma madrileña La Más Bella. Este primeiro obradoiro desenvolverase ata o sábado 4, mentres que entre os días 16 e 18 de decembro celebrarase un segundo obradoiro sobre tipografía impartido polo deseñador catalán Andreu Balius, recoñecido como un dos referentes internacionais da creación tipográfica. En ambos casos, a organización seleccionará os alumnos entre o amplo número de solicitudes recibidas para cubrir as prazas dispoñibles.

Para o resto das actividades do Foro de Edición e Tipografía, a entrada é libre e gratuíta ata completar a capacidade. A Casa das Campás acollerá o sábado día 4 a mesa redonda A edición como campo aberto de expresión, na que intervirán os galegos Manuel Bragado, director de Edicións Xerais; Tati Mancebo, da empresa de xestión cultural Algueirada; Pepe Barro, responsable do estudio Grupo Revisión; Marcos Dopico, investigador e profesor de Deseño na Facultade de Belas Artes de Pontevedra, e Ángel Cerviño, escritor e artista visual, xunto cos creativos portugueses Dino dos Santos, Nuno Coelho, Isabel Carvalho e Pedro Nora.

Marcos Dopico e Dino dos Santos impartirán, así mesmo, senllas conferencias sobre o deseño gráfico en Galicia e sobre as tipografías para xornais que terán lugar os días 16 e 17 de decembro, respectivamente. Pola súa banda, Nuno Coelho presentará neste foro a súa obra Uma terra sem gente para gente sem terra. Um livro de colorir sobre a palestina, realizada en colaboración con Adan Kershaw e a través da que ofrece un discurso visual arredor da tensión social que na vida cotiá dos cidadáns palestinos xera o conflito árabe-israelí.

Exhibición de obras gráficas

Coincidindo coa celebración do Feet, a Casa das Campás tamén será a sede dunha exposición de obras gráficas que poderá visitarse do 2 ao 16 de decembro. Nela exhibiranse as creacións dunha decena de editoras de diferentes países, como Shift! (Alemaña), Clase Turista (Arxentina), La Más Bella (España), as portuguesas Braço de Ferro e Oficina do Cego ou a galega Entrecruzar, entre outras. A DAG mantén aberto ata o 28 de novembro o prazo de recepción de propostas para participar nesta exposición, dirixida a publicacións especiais no campo da arte, do deseño ou da tipografía, en calquera formato ou material.

Antes deste encontro profesional, Pontevedra acollerá unha penúltima cita coa programación de CREATIVA, que terá lugar esta fin de semana no marco do Culturgal 2010. O foro As industrias culturais en tempos de crise. Retos, recursos e modelos de éxito será a actividade central deste programa europeo na Feira das Industrias Culturais, dentro da que tamén promove a celebración de dous concertos con artistas brasileiros, portugueses e galegos, así como exposicións, obradoiros e microfestivais.

Máis información: http://feet.asociaciondag.org/ e www.creativacultural.com

Que buscas

País

Provincia

Localidade

Ámbito

<<  Xullo  2017    >>

L
M
Mi
J
V
S
D
 
 
 
 
 
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
 
 
 
 
 
 
© 2009 Creativa Cultural - Todos los derechos reservados  |  Acceso privado